பழைய முகமூடிகளுக்கு புதிய முகமூடிகள் !

இக்கவிதைகளின்   ஒருவித   அதீதக்  கற்பனைக்காட்சியமைவும்,
எளிமையான   தோற்றமும்,     திடீர்த்தன்மையும் (Abruptness),
சுருக்கமான,      அவசரமான   நடையும்   படிப்பவர்களை   எளிதில்
ஏமாற்றிவிடக்கூடும்  -   மூல விஷயத்திலிருந்து  கவனத்தை வேறு
பக்கம்    திருப்பிடக்கூடும்.    இக்கவிதைகளில்    திரும்பத் திரும்ப
வருவது  "முகமூடி"  எனும் ஒரு விஷயம் தான்.   ஆனால், அது பற்றி
இக்கவிதைகளுக்கு  வெளியே  நான்  விளக்கம்   ஏதும்    கொடுக்க
இயலாது; நம்முள்ளும், நம்மைச்சுற்றியுள்ளவர்களுள்ளும் மண்டிக்
கிடக்கும்   பொய்மையின்,    போலித்தனங்களின்    ஒரு  மொத்தக்
குறியீடு     என்பதைத்தவிர.     இக்கவிதைகளைப்   படிக்கும்போது
வெளிப்படும்    நகைச்சுவைக்கும்   கீழே,  ஆழத்தில் 'முகமூடி'யின்
பலவித பரிமாணங்கள் படிந்துகள்ளன.

19.02.1989                                                               மா.கணேசன்/ நெய்வேலி
                       <•>

அவர்கள் ஏன் என்னை அப்படிப்பார்த்தார்கள்
என்பது முதலில் எனக்குப்புரியவில்லை
ஒருவேளை நிர்வாணமாய் வெளியே
வந்திட்டேனோவென்று
குனிந்து பார்த்தேன் - இன்னொரு முறை
எனது ஆடை மடிப்புகளைச்
சரி செய்துகொண்டேன்.
அவர்கள் எனது முகத்தைப்பார்த்துச்
சிரிப்பதாகத் தோன்ற
எனது முகத்தைத் தடவிப்பார்த்தேன்
ஒன்றும் இல்லை.
ஆனால், அவர்களது முகங்களை
உற்றுப்பார்த்தபிறகே தெரிந்தது
என்னிடம் முகமூடி இல்லையென்பது.

•

தெருவில் வியாபாரி
எதையோ கூவிச்சென்றான்
வெளியே
எட்டிப்பார்த்தேன்
"பழைய முகமூடிகளுக்கு
புதிய முகமூடிகள்"
என்று
கூவிச்சென்றான்.

•

சட்டையிலுள்ள
சிறு ஓட்டையைக் கண்டு
முகம் சுளிக்கும்
சமுதாயம்
மனிதரகளின்
முகமூடிகளை
அவை
எவ்வளவு தான்
கிழிந்து
தொங்கினாலும்
கண்டுகொள்வதில்லை.

•

எவ்வளவு தான்
பழசாகிப்போனாலும்
கிழிந்து போனாலும்
சமுதாயத்தில்
எப்போதும்
பயன்பாட்டில் இருப்பது
முகமூடிகள்
மட்டுமே.

•

இங்கே நான்
தேடிக்கொண்டிருக்கையில்
சற்று தள்ளி
ஒரே கூச்சலும்
குழப்பமுமாய் இருந்தது
அருகே சென்றேன்
அங்கே ஒரு கூட்டம்
சண்டையிட்டுக்
கொண்டிருந்தது
"உன்னுடையது
என்னுடையது"
என்று ஒரு முகமூடியை
வைத்துக்கொண்டு.

•

என் காதலி
என்னை மறுத்து விட்டாள்
எனது இம்முகம்
பிடிக்கவில்லையாம்
அவளுக்கு.

•

என்னிடம்
ஏராளமான
முகமூடிகள் உள்ளன
ஒவ்வொரு வேளைக்கும்
ஒவ்வொரு நபருக்கும்
என்று
கணக்கில்லாது.
இமைக்கும் நேரத்தில்
முகமூடிகளை
மாற்றிக்கொள்ளமுடியும்
என்னால்.
இருந்தும்
சில வேளைகளில் நான்
மிகவும் குழம்பிவிடுகிறேன்
இந்த வேளைக்கு எந்த
முகமூடியை
அணிவதென்று?

•

எனது பெரும்சோகம் :
எந்த முகமூடியும்  என்னை
எடுத்துக்காட்டுவதில்லை
என்பதுதான்!

•

அதிருப்தியில்
என் முகத்தை நானே
பிய்த்துக் கொள்கிறேன்
வெறும் முகமூடிகளாகக்
கழன்று விழுகின்றன
ஒன்று,
இரண்டு,
மூன்று,
. . . . .
. . . . . . .
. . . . . . . . .
முகமே இல்லாமல்
போய்விட்டால்
என்ன செய்வதென்று
அதிர்ச்சியில்
நிறுத்திக் கொண்டேன்.

•

நிலவெரிக்கும்
ஓரு முன்னிரவில்
எவருக்கும் தெரியாமல்
முகமூடியில்லாமல்
தெருவில்
இறங்கி நடந்தேன். . . . .
நேரம் போனது தெரியாமல்
இரவெல்லாம் சுதந்திரமாகச்
சுற்றித் திரிந்திட்டேன் -
என்பதை உணர்ந்ததும்
விடிவதற்குள்
எனது அறையை அடைந்திட
முகம் தெறிக்க
எடுத்தென்
ஓட்டம்.

•

ஓய்வாக
எனது
முகமூடிகளை
எண்ணிக்கொண்டிருக்கிறேன்.
கடந்த காலங்களில்
அவைகளால் கிடைக்கப்
பெற்ற
அனுபவங்களையும்
அனுகூலங்களையும்
அனைத்தையும்
ஒவ்வொன்றாக
அசைபோட்டவாறே -
ஆனால் எதுவும்
நிறைவளிப்பதாய் இல்லை.
இப்போது
எனது
உண்மையான முகத்தைத்
தேடிக்கொண்டிருக்கிறேன்.

•

நகருக்குள்
முகமூடிக்கொள்ளையர்கள்
அலைகிறார்கள்
என்று தெரிந்ததும்
சிறிது சந்தோஷப்பட்டேன்
ஆனால்
அவர்கள்
முகமூடிகளுக்காக
வரவில்லை
என்பது தெரிந்ததும்
முகம் வாடினேன் -
முகமூடிகளை
பத்திரப்படுத்திக்
கொண்டேன்.

•

உலகம் அழியப் போகிறது
எனும் கூற்றை என்றும் நான்
நம்பியது கிடையாது.
இன்று காலையில்
நண்பனின் மனைவிக்கு
புதிதாய்ப் பிறந்த குழந்தையைப்
பார்க்கச் சென்றிருந்தேன்
மருத்துவமனைக்கு -
குழந்தை அழகாகவே இருந்தது
ஆனால், முகமூடியுடன்!
திகைத்துப்போனேன் நான்.
நம்பமுடியாமல்
பக்கத்துக் கட்டில்களிலிருந்த
மற்ற குழந்தைகளைப் பார்த்தேன்
எல்லா குழந்தைகளுமே
முகமூடிகளுடன் இருப்பதைக்
கண்டவுடன்
பயம் என்னைப் பிடித்துக்
கொண்டது!

•

இப்போது
எனது
பெரும் பிரச்சினை :
"முகமூடியுடன் இருப்பதா?
அல்லது முகமூடியில்லாமல்
இருப்பதா?

•

முகமூடிகள் கிழிக்குமிடம் :
மா.கணேசன்
222, அசோக் நகர்-II
காந்தி நகர் அஞ்சல் -607308
குறிஞ்சிப்பாடி வட்டம்
கடலூர் மாவட்டம்
கைப்பேசி : 94881 94381

----------------------------------------------------------------------------